mBek-mBekan lan tawuran..

.
Lahir lan gede nang Madiun.. ngenes ndelok cah-cah enom senengane tawuran. Mungkin aku wis gak enom meneh, wis tuwek, mula angel paham, piye nalare wong mung peguron pencak ae kok direwangi nganti toh nyawa, selagine emboke sing meteng sangang sasi nglantarne lair direwangi ngeden setengah mati, bapake sing montang manting merga nggolekne upa dinggo ngloloh karo klambi sak susuwek wae gak tau dibelani nganti ngono kuwi.
Apa untunge mbelo peguron? Wong gak tau ngekeki badogan, gak tau nyangoni duwik? Apa merga gak nduwe kebanggaan liyane mula peguron wis koyo dewa sing disembah-sembah lan dibelani nganti mati... Lha nyembah sakliyane Gusti Allah iku rak musyrik hukume tooo…
Cara ndeso biyen, gelut "mbek-mbekan" iku dolanane cah ngarit, cah angon utawa bocah ndesit sing gak mambu pendidikan. Masiyo ngono, mbek-mbekan isik nganggo aturan. Entuk mung tantang-tantangan, pisuh-pisuhan, idon-idonan utawa jotos-jotosan, piting-pitingan, banting-bantingan nang pasir nganti babak bundas. Tapi gak entuk nganggo senjata, gak entuk dibelani. Kanca-kancane sing dadi wasit gak entuk melok-melok, tapi ya gak entuk misah kecuali onok sing curang utawa onok sing wis meh mampus. Dolanan iku disebut mbek-mbekan sebab sing rumangsa kalah mbengok "mbeeek".. kaya wedus dibeleh… biasane mungsuhe terus ngerti, sing dipiting diculne... Sing nonton surak-surak, sing menang bangga dadane maju, sing kalah kisinan ingah-ingih…
Gelut sing medeni nek onok tontonan ludruk, ketoprak utawa drama ndangdut... biasane sing gelut “warokan” masalahe iso rebutan cewek, kalah main, urusan bisnis utawa merga kepidek sikile. Biasane diwiwiti padu nang nduwur panggung, merga nganggo speaker mula dirungokne wong akeh, terus antem-anteman.. kadang-kadang malah bacok-bacokan barang. Sing nonton gak wani nyedek… pada nyingkir karo mbengok “minggir, minggir, minggir kecipratan getih..”. Merga medeni, biasane sing misah pulisi ngango pistul dor, dor, dor…
Tawuran kuwi rak tukaran rombongan wong ngajak-ajak balane, dadi kaya perang... mula sasarane ora mung uwong tapi bangunan, montor lan barang liyane... sering korban nyawa karo tatanan masyarakat dadi rusak (gak tentrem, musuh nang ngendi-endi, curiga terus karo wong). Cah-cah enom kuwi nalika tawuran mesti gak mikir jero, lha piye wong tawuran merga diojok-ojoki utawa dipeksa kancane.. bareng ditakoni apa alasane nyerang.. mung lholhak-lholhok thok kaya wong pengung. Mula enek sing ngarani, tawuran kuwi merga pikiran cupet, utawa fanatik karo bolone utawa golongane dewe.. tawuran iku tandane jiwa kerdil, tandane pikiran cupet… Engko gek pikiran cupet merga ekonomine bendino ya cupet..

Dilulu...

Ora ono bahasa Indonesia sing pas kanggo terjemahan boso Jowo “dilulu”. Dilulu maksude dituruti kekarepane, nanging ora merga entuk kabecikan malah kapara diloropne utawa dijlomprongne. Ana bocah sing nakal banget senengane ngebut, dielingne bolak-balik gak mari malah saya ndadi. Mula wong sak kampung bosen olehe ngandani, saiki bocah iku mau dilulu. Masiyo kelakuane gak disenengi wong sekampung nanging wis ora nate dikandani malah dibombong-bombong supaya ngebut sing luwih banter lan pamer atraksi sing luwih nggegirisi. Maksude wong sekampung ora merga bangga utawa ngeman bocah mau nanging njlomprongne lan muji muga-muga ae bocah iku enggal nabrak cagak listrik sisan modar….
Ing boso Ngarab tak kira ono padane tembung dilulu, yaiku istidraj sing contone wong sing sugih nanging cethil, senengane tumidak maksiyat, nanging malah nikmate nambah-nambah terus. Wong iku dilulu dening Gusti Allah. Wong sing dilulu bakal lali purwa duksina, lupa daratan bahasa Indonesiane… Rumangsa entuk kanugrahan merga rejekine ndlidir terus, rumangsa disayang Gusti Allah merga sak polah-polahe ora nate ngrasakne ngrekoso, rumangsa tumindake wis bener terus wong ora nate rumangsa dielingake, mula ora rumansa perlu introspeksi wong ora ngrumangsani salah… akire saya suwe tumindake wong istidraj saya nalisir saka uger-uger. Yen nganti titi wancine tetep ora sadar nek klebu golongan istidraj, bakal kejlomprong marang papan kang nistha lan rasa keduwung kang tanpa upama kang dirasa..

Mbulet tur bundet..

Kang Tomedjo wong Jowo deles, kepingin tilik sedulure sing dadi transmigran. Mangkat soko terminal Amplas Medan numpak bis ALS tujuane daerah Mandailing-Natal sing saiki jenenge diganti "Madina".
Nembe ae bis budal, wis takon marang sopire, "Bang, Natal isik suwe????"
"Maksude kuto Natal? Sampeyan arep nyang Natal?... Yo wis sampeyan kepenakne leh istirahat, wong isik rolas jam-an kok", ujare pak sopir.
Tomedjo banjur meneng sedela, nanging durung ono setengah jam wis takon maneh,
"Medan nganti Natal rolas jam... lha nek Natal tekan Medan pirang jam Bang?"
Sopire njawab rodo males, "Medan tekan Natal iku kira-kira rolas jam... nek gak percaya, ya sampeyan etung dewe wae".
"Ora ngono Bang.. sing rolas jam-an kuwi rak Medan menyang Natal, lha nek Natal menyang Medan pirang jam?", pitakone Tomedjo tanpa dosa.
"Apa bedane... nek Medan nganti Natal iku rolas jam-an, sebalike nek soko Natal menyang Medan yo mesti uga rolas jam ..", jawabe sopir rada mengkel dioyak pitakonan mbulete kang Tomedjo.
"Kok biso podo ya…. Bang", aloke Tomedjo sing nambahi mangkele sopir.
"Wah... nek ngono sampeyan ki rodok o'on tenan?", sumaure sopir sinis, "lha nek mangkat karo balike liwat dalan sing podo, mestine wektune ya podo to Mas.... kecuali nek ono alangan nang ndalan, umpamane... bis iki nyemplung jurang koyo pak Jendral Rajagukguk biyen kae…!!!".
Nanging Tomedjo durung marem, buktine isik grenengan, "Tapi.... nek soko Natal tekan Tahun Baru iku seminggu.. kok Tahun Baru tekan Natal setahun yoooo????"

Dijewer Gusti Allah

Poso wis entuk rong minggu, weteng luwe wis mulai ora kroso.
Racun ing awak wis dibuang
Banjur kemaruk, ujub, takabur....
Rumangsaku awak luwih seger, sehat, otot kawat balung wesi.
Ngibadah soyo grengseng.. kumudu-kudu enggal katam lehe moco Quran.
Tarweh ojo nganti bolong.
Umuk setengah sombong. rumongso wis dingapuro dosa-dosane.
Rumangsa dadi wong kang cinaketan lan diasihi karo Gusti Allah.
Rumangsa ora ono meneh sing salah kudu dipenerake.
Elinga kowe..... menawa mengkono terus, Gusti Allah bakal njewer kowe.
Lah harak tenan, tan kocapa naliko mung mergo ono krikil sak kacang ijo.. kowe kudu lumah-lumah tanpa daya limang dino.. posomu kudu distop, ngajimu ora bisa terus, tarwehmu kudu absen.
Mula... aja gambang gede roso, aja gampang umuk rumangsa nek wis kinasihan Pangeran,
bakal entuk kanugrahan...

Es semangka marahi mati...

Poso iki, panas banget hawane, srengenge sumelet... nembe udan pisan seminggu sakdurunge poso lan nganti dino ping sewelas durung nate ono udan sing tumiba nelesi bumi Betawi. Ing wanci awan nalika srengenge sumelet gae mletek embun-embunan, sering myangne mendah segere es blewah utawa es timun suri kanggo nelesi gurung garing aking ing wetu buka.
Semangka senajan seger rasane, nanging pancen ora biasa digawe es. Malah jaman isih bocah, simbah nuturi ora pareng mangan semangka dicampur nganggo sirup utawa gula, "bisa marahi mati". Aku dewe ora ngerti apa alesane, lha nek uwong lak mesti mati... ora peduli mangan semangka dicampur gula apa ora. Nek marahi loro weteng kok ya aneh, kenapa ono jus semangka utawa melon sing akeh sing seneng tura ora ono lapuran marahi mules.

Bantal Kayu Randu

Randu (Ceiba pentandra).
Witing randu, ing tengah ketiga wiwit ngembang lan rontok godonge,
Mbediding kembang randu, enake wong turu mancal kemul ing esuk nalika lengo klentik podo njendel beku.
Empuk kayune randu, sinigar ginawe cathok kanggo belok sikile wong edan supaya ora ora ngisin-isini. Mung merga pakurmatan kudu ngrampas kamardikan.
Kapuk randu kanggo isi bantal empuk mentul, kayu randu bantale sing podo laku sufi.
Supaya tengah wengi bisa gumregah tangi, manembah lan maneges kersaning Gusti.
Bantal kayu randu ing amben galar iku,
linambaran kloso mendong bolong-bolong.
Pancen bantal kayu randu iku isih gumletak wungkul.
Warna abu lan gandaning kringet tuwo isih bisa dirasa.
Nanging wis ora keprungu meneh, ing bengi galar kumreket amarga awak tuwa sing lagi mulet. Randu pikiranku tumuju ing jaman kawuri...

Kesambet dhemit ngisor kesambi

Dhemit iku gak beda ambek menungsa, senengane mapan nang nggon sing enak, eyup, adhem lan angine semilir. Mula gak anek angger ana wit sing rembuyung nang kono kuwi nggon dhemit. Tansaya meneh nek sering disebari kembang, dikutuki menyan, ambune wangi, demit soyo krasan manggon. Wit kesambi godonge gembel, wohe dijenengi cacil... mula wit kesambi iku panggonane dhemit sing matane mecicil...
Ambak podo demite.. jinise reno-reno. Ono sing diarani medon utawa demit sing rupane koyo pocong, ono gendruwo utawa demit sing gedhe duwur rambute gimbal, ono tuyul sing koyo cah cilik nganggo clono kancut, senengane nyolong duik, ono sundel bolong sing rupayu ayu senengane nggoda wong lanang nang wayang bengi (dudu sing nang kafe utawa diskotik iku)...
Sampeyan wis tau eruh demit tooo? Durung? Podo aku durung nate eruh..... Masiyo podo-podo durung tau eruh dhemit tapi isik iso lancar ngobrolne dhemit, terus nek mlaku nang panggonan sing angker mesti isik wedi.
Dhemit pancen jahil, senengane nggoda menungso. Wong turu diganggu, dipindah nang panggonan sing medeni. Wong mlaku diweruhi "penampakan" sing aneh-aneh. Malah yen wonge kosong imane.. dileboni. Lah kelebon dhemit naliko sobo nang nggon angker iku disebut kesambet... tegese dhemite mlebu tanpa kulonowon. Cirine wong kesambet biasane owah adate, sing biasane sabar dadi seneng ngamuk, ngoceh ora karuan, perangan awake kram, lsp. Biasane arang nulis blog ujug-ujug malik rajin, iku mbokmenawa merga kesambet....